S Pfila 2019 isch verbi :(

Pfila 2019 – Die wildi Horde usem Norde

Sit em Mäntig simmer jetzt wieder zrug us em Pfila, jetzt nochdem ich de Lagerkoller lagsam überläbt han chani au äntli eu, dene wo ned debi gsi sind über euses super Pfila brichte.

Die wildi Horde us em Norde

Am Samstig hets ahgfange mer hend eus alli am Morge bi de Busshaltestell z Niederwil troffe, det hemmer eus i zwei Gruppe ihteilt. Di schnelle und di langsame schöne 😊 Mer sind mit em Velo via Wohle – Walteschwil bis uf Althäusern gfahre. Det hemmer den en aktivi Rundi Wer het Angst vor em böse Wickinger gspillt. Nocher het de Ufbou vo eusem tolle Sarasani, de Zält und em stille Örtli ahgfange. Am Obig hemmer de no en Rundi Totto gspillt, jede het en Challenge gege öper anders gha und die andere hend chöne wette wer das günt. Und de het de au scho di erst Nacht under de Stärne oder im Zält ahgfange.

Am Sunntig Morge het eus den d Chuchi mit emene wunderbare Brunch überrascht. D Eier sind noch em zweite mol choche uf em Füür de au guet gsi 😊 Nocher hets en Schatzsuechi i zwei Gruppe geh de Schatz sind zuetate für en Fruchtsalat gsi wo nocher jedi Gruppe eine gmacht het. No vor em Mittag hemmer vo Wickinger en Charte für en witere Schatz becho. Im Schatz womer nocher gfunde hend hets es cool Ahdänke für alli gha. Wo s Zmittag de fertig gsi isch hets de no es aktivs Gländespiel geh. Am Obig hemmer no de Abschlussobig gha, d Wickinger sind nomol do gsi, es het es grosses Füürwärch geh und den simmer alli zum letschte mol ab is Zält.

Am Mäntig isch den wideremol s Ufrume im Vordergrund gstande, mer hend noch em letschte Zmorge ahgfange s Sarasani und alles andere zäme z rumen. Am 1 isch de mit de Velos wieder ab richtig Niederwil gange. Im Strömende Räge simmer ganz tapfer bis uf Niederwil gfahre und hend det eusi Eltere wieder troffe.